Служба Крещению Руси и св. кн. Владимиру

СЛУЖБА ГОСПОДУ БОГУ НАШЕМУ, В ТРОИЦЕ СЛАВИМОМУ, В ПАМЯТЬ КРЕЩЕНИЯ РУСИ И СВЯТАГО РАВНОАПОСТОЛЬНАГО КНЯЗЯ ВЛАДИМИРА

НА МАЛЕЙ ВЕЧЕРНИ

На Господи, воззвах: поставим стихов 4 и поем стихиры, глас 1.

Подобен: Небесных чинов:

Десницею Всевышняго укреплен,/ великий княже Владимире,/ идольскую прелесть отринул еси, славне,/ и, святым Крещением просветився,/ светом познания Христова/ землю Русскую озарил еси. Дважды Начальника нашего во благочестии христианстем,/ приидите, восхвалим, людие российстии,/ приснославнаго великаго князя Владимира,/ идолы поправшаго/ и святым Крещением/ землю Русскую просветившаго.

Светоносная твоя память,/ равноапостоле,/ днесь возсия нам всерадостно,/ веселящи души и сердца/ твоего Богоразумия добротою,/ великий княже Владимире.

Слава, глас 6. Самогласен:

Днесь страна Российская,/ яко новаго царя Константина, тя стяжавши,/ светло ликовствует,/ великий княже Владимире,/ радостно память твою торжествующи,/ мы же, чада твоя, молебно вопием ти:/ молися, равноапостоле, ко Господу/ спасти и просветити души наша.

И ныне, Богородичен, глас тойже:

Никтоже, притекаяй к Тебе,/ посрамлен от Тебе исходит,/ Пречистая Богородице Дево,/ но просит благодати/ и приемлет дарование к полезному прошению.

На стиховне стихиры, глас 2.

Подобен: Доме Евфрафов:

От земных к Небесным пришел еси, радуяся,/ великий княже Владимире,/ и, почесть восприем от Христа Бога,/ Тому молися/ спастися душам нашим.

Стих: Вознесох избраннаго/ от людей Моих.

Лучами Богоразумия просветився,/ идолы попрал еси,/ равноапостоле,/ Христову же веру/ во отечествии твоем насадил еси.

Стих: Елеем святым Моим/ помазах его.

Стадо твое соблюди,/ егоже ко Христову познанию привел еси,/ великий княже Владимире,/ и державу Российскую/ в мире сохраняй присно.

Слава, и ныне, глас 8. Самогласен:

Приидите, возрадуемся,/ Заступницу рода нашего воспевающе днесь,/ Пречистую Деву Богородицу,/ Ейже великий князь Владимир/ храм пречестен созда/ и десятину тому от имений своих даяше,/ емуже подражающе,/ вместо десятины песни хвалебныя Ей принесем,/ зовуще и глаголюще:/ Палато Слова/ и светлый Чертоже всех Царя,/ сподоби нас, смиренных, покрова Твоего/ и буди нам Помощница/ во спасение душ наших.

Тропарь святаго, глас 4:

Уподобился еси купцу, ищущему добраго бисера,/ славнодержавный Владимире,/ на высоте стола седя матере градов, богоспасаемаго Киева:/ испытуя же и посылая к Царскому граду уведети православную веру,/ обрел еси безценный бисер – Христа,/ избравшаго тя, яко втораго Павла,/ и оттрясшаго слепоту во святей купели,/ душевную, вкупе и телесную./ Темже празднуем твое успение,/ людие твои суще,/ моли спастися державы твоея Российския начальником и множеству владомых.

Слава и ныне, Богородичен, глас 4:

Заступнице усердная,/ Мати Господа Вышняго,/ за всех молиши Сына Твоего, Христа Бога нашего,/ и всем твориши спастися,/ в державный Твой покров прибегающим./ Всех нас застпупи, о Госпоже, Царице и Владычице,/ иже в напастех, и скорбех, и в болезнех обремененных грехи многими,/ предстоящих и молящихся Тебе умиленною душею/ и сокрушенным сердцем/ пред пречистым Твоим образом со слезами/ и невозвратно на-дежду имущих на Тя,/ избавления всех зол,/ всем полезная даруй/ и вся спаси, Богородице Дево:/ Ты бо еси Божественный покров рабом Твоим.

Ектения и отпуст.

НА ВЕЛИЦЕЙ ВЕЧЕРНИ

Блажен муж: 1-й антифон. На Господи, воззвах: стихиры на 8: стихиры Крещения Руси 4 и стихиры святаго Владимира 4.

Стихиры Крещения Руси, глас 5.

Подобен: Радуйся, Живоносный Кресте:

Радуются Небо и земля,/ ангели ликуют, людие торжествуют,/ се бо Христос, Бог наш,/ яко невесту украшенну и избранну,/ Церковь Русскую Себе обручи,/ люди ея на пажить безсмертия приведе/ и спасе от работы вражия Крещением святым,// подая мир душам нашим.

Радуйся, Земле Русская,/ купелию Крещения обновленная,/ в нейже от греха омылася еси,/ тьму идольскую поправши,/ и суемудрие иудейское и агарянское отринула еси,/ правую веру в чистоте восприявши,/ и Христа, Солнце Праведное,/ от Востока взыскала еси,// подающаго мир душам нашим.

Радуйся, Земле Русская,/ от восток солнца до запад/ одеждею Крещения светло украшенная,/ кровьми мученик обагренная,/ слезами преподобных омовенная,/ труды святителей возделанная/ и, яко сад райский, процветши,/ плод сторицею Христу принесла еси,// подающему мир душам нашим.

Радуйся, Церковь Русская,/ благочестия сило непобедимая,/ еюже одолела еси вся наветы вражия,/ святыни сокровищнице неоскудеваемая,/ терпения кладезю неизчерпаемый,/ милосердия деснице безмездная,/ веры, надежды и любве столпе огненный,/ восходяй до Христа, Сына Божия,// подающаго мир душам нашим.

Стихиры равноапостольнаго князя Владимира, глас 4.

Подобен: Яко добля:

Вторый ты был еси Константин/ словом и делом:/ он во христианское время родися/ и многа лета во еллинстве сотворил есть./ Ты же от варяг* <*в некоторых изданиях – от язык> родився,/ но возлюбил еси возлюбившаго тя Христа,/ к Немуже возшел еси, радуяся./ Егоже моля не престай о чтущих память твою.

Веселится вечно, светло сияющи, гора Синайская,/ Моисейским освятившися законом,/ Невидимаго видевши,/ светло же сияя, веселится и радуется/ великий град твой, Василие* <*в некоторых изданиях вместо имени Василий употребляется Владимир>,/ не яко во мраце,/ но яко в Дусе, Сына со Отцем видя в себе славима./ Егоже моли/ спасти и просветити души наша.

Якоже отец духовно, царь же чувственно/ Российским людем был еси, Василие:/ истинный же проповедатель, яко апостол Христов,/ провозвестил еси спасительное Крещение/ и, тем светло просветив, освятил еси люди твоя/ во всех странах царствия твоего, блаженне.

Корень правоверия ты был еси, Василие,/ напоен же Духом Пресвятым,/ возрастивый нам ветви богосажденныя,/ цвет благоухания источающия,/ Бориса чуднаго и Глеба, ревнителя благочестию,/ кипящия всем верным обильно чудесы./ С нимиже предстоя Христу,/ молися спасти и просветити души наша.

Слава, глас 8:

Приидите, стецемся вси/ в честней памяти отца Российскаго/ и наставника нашего Владимира:/ сей бо от варяг* <*в некоторых изданиях – от язык> родися,/ и возлюби возлюбившаго его Христа,/ к Немуже взыде, радуяся,/ с праматерию своею Еленою./ Вся бо люди своя научи веровати/ и покланятися в Троице единому Богу,/ идолы же разрушив, попра/ и взрасти нам своя честныя леторасли,/ Романа и Давида./ Темже и мы, светло ныне песньми память их верно чтуще,/ любовию празднуем:/ да молятся о нас ко Господу,/ воинству нашему подати победы на поганыя враги,/ и умирити весь мир, и спасти души наша.

И ныне, догматик, глас тойже:

Царь Небесный за человеколюбие на земли явися/ и с человеки поживе,/ от Девы бо Чистыя плоть приемый/ и из Нея прошедый с восприятием,/ един есть Сын, сугуб естеством,/ но не Ипостасию./ Темже, совершенна Того Бога/ и совершенна Человека воистинну проповедающе,/ исповедуем Христа Бога нашего:/ Егоже моли, Мати Безневестная,/ помиловатися душам нашим.

Вход. Прокимен дне и чтения.

К римляном послания святаго апостола Павла чтение (зачало 91):

Братие, елицы во Христа Иисуса крестихомся, в смерть Его крестихомся. Спогребохомся убо Ему Крещением в смерть, да, якоже воста Христос от мертвых славою Отчею, тако и мы во обновлении жизни ходити начнем. Аще бо сообразни быхом подобию смерти Его, то и воскресению будем. Сие ведяще, яко ветхий наш человек с Ним распятся, да упразднится тело греховное, яко ктому не работати нам греху. Умерый бо, оправдися от греха. Аще ли умрохом со Христом, веруем, яко и живи будем с Ним. Ведяще, яко Христос воста от мертвых, ктому уже не умирает, смерть Ему ктому не обладает. Еже бо умре — греху умре единою, а еже живет — Богови живет. Такожде и вы помышляйте себе, мертвым убо быти греху, живым же — Богови, о Христе Иисусе, Господе нашем.

К Титу послания святаго апостола Павла чтение (зачало 302):

Чадо Тите, явися благодать Божия, спасительная всем человеком, наказующи нас, да отвергшеся нечестия и мирских похотей, целомудренно и праведно, и благочестно поживем в нынешнем веце, ждуще блаженнаго упования и явления славы великаго Бога и Спаса нашего Иисуса Христа, Иже дал есть Себе за ны, да избавит ны от всякаго беззакония и очистит Себе люди избранны, ревнители добрым делом. Егда же благодать и человеколюбие явися Спаса нашего Бога, не от дел праведных, ихже сотворихом мы, но по Своей Его милости, спасе нас банею пакибытия и обновлением Духа Святаго, Егоже излия на нас обильно Иисус Христом, Спасителем нашим, да, оправдившеся благодатию Его, наследницы будем по упованию Жизни Вечныя.

Царств третиих чтение (глава 8):

Ста Соломон пред лицем жертвенника Господня/ пред всем собором Израилевым,/ и воздев руце свои на небо, и рече:/ Господи Боже Израилев,/ несть бог, якоже Ты, на небеси горе и на земли доле./ Аще бо небо и небо небесе не довлеют Тебе,/ како дом сей, егоже создах имени Твоему?/ Обаче да призриши на молитву мою, Господи Боже Израилев,/ услышати моления и молитву, еюже раб Твой молится пред Тобою к Тебе днесь./ Да будут очи Твои отверсты на дом сей день и нощь,/ на место сие, о немже глаголал еси:/ будет Имя Мое тамо, еже услышати молитву,/ еюже молится раб Твой на месте сем во дни и нощи./ И послушати мольбы раба Твоего и людей Твоих Израиля./ И елика аще помолятся к Тебе на месте сем,/ и Ты услышиши на месте жилища Твоего на Небеси,/ и сотвориши, и милостив будеши им.

На литии стихира храма, таже святаго и Крещения Руси.

Стихиры святаго, глас 2:

Днесь возсия благочестиваго князя Владимира память,/ яко миро излиянное:/ Христа бо возлюбив, идолы преобидев,/ церкви Распеншемуся нас ради на земли воздвиже/ и на Небесех прият Царство и венец.

Вторый ты бысть Константин словом и делом:/ научился еси правоверию/ и просветил еси землю Русскую святым Крещением/ повелением возлюбившаго тя Бога./ К Немуже взыде, радуяся,/ Егоже и моли, Христа, Владимире, непрестанно/ о чтущих любовию память твою.

Стихиры Крещения Руси, глас 1.

Подобен: О, дивное чудо:

О, дивное чудо!/ Древо Жизни/ над Русью воздвизается/ и всем спасительное бывает,/ веселися, Церковь Русская,/ новый Христов доме,/ равноапостольных Владимира и Ольгу имуще предстателей,/ велегласно возопиим, вернии:/ Живоносный Кресте, радуйся!/ Тобою Господь// подает спасение и велию милость.

Слава, глас тойже. Самогласен:

О, дивное чудо!/ Водою Крещения/ жизнь вечная даруется/ и начало спасения купель бывает,/ веселися, Церковь Русская,/ новая дщи Христова./ Возопиим, вернии,/ святых земли нашея имуще предстателей:/ Живоносный Кресте, радуйся!/ Тобою Господь// подает воскресение и велию милость.

И ныне, Богородичен, глас 8.

Подобен: О, преславнаго чудесе:

О, преславнаго чудесе!/ Небесе и земли Царица,/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О Владычице Державная!/ Не престани и на будущее время/ во утверждение на Руси православия// милости и чудеса изливати до века. Аминь.

На стиховне стихиры святаго, глас 8.

Подобен: О, преславнаго чудесе:

О, преславнаго чудесе!/ Величавый разум погубляется днесь/ и рыдают вся лукавая воинства,/ видяще ветвь сущу вседичну* <*вседичну – совершенно одичавшую>,/ силою Божиею богонасажденну, и прославляему,/ и светло венчаваему от Бога,/ великаго Василия,/ нашего вернаго начальника.* <*стихира исправлена по изданию: Служба с акафистом святому равноапостольному великому князю Владимиру. Ко дню 900-летия Крещения Руси. М., 1888.>

Стих: Вознесох избраннаго/ от людей Моих.

Дивная чудес пучина,/ жестосердия бо разумом/ иже вотще шатахуся,/ от лица днесь Василиева/ веселятся в честней Церкви,/ и царствует Христос Бог,/ обрет его, яко Павла прежде,/ и постави князя верна на земли Своей,/ просветившаго люди своя честным Крещением.

Стих: Елеем святым Моим/ помазах его.

Радуйся, Российская похвало./ Радуйся, верным правителю./ Радуйся, Божественный Владимире, начальниче наш./ Радуйся, веры забрало./ Радуйся, чудо чудесем преславное/ и притекающим пристанище тихое./ Радуйся, всесвятый каменю веры* <*в некоторых изданиях – кореню веры>/ и молебниче о поющих тя/ и величающих верно.

Слава, глас тойже:

Начальника благочестия,/ и проповедника веры,/ и князей российских верховнаго,/ днесь, Российстии собори, сошедшеся,/ восхвалим великаго Владимира,/ апостолом равнаго,/ хвалами и песньми духовными венчаем его, глаголюще:/ радуйся, Христов воине прехрабрый,/ яко томителя врага до конца погубив/ и нас от лести его избавив,/ привел еси Царю Христу Богу./ Но, о преблаженне и всехвальне,/ мир моли подати отечеству нашему/ и на поганыя победы,/ Церкви благостояние/ и душам нашим велию милость.

И ныне, Богородичен, глас тойже:

Владычице, приими молитвы раб Твоих и избави нас от всякия нужды и печали.

Или ин Богородичен, глас тойже.

Подобен: О, преславнаго чудесе:

О, преславнаго чудесе!/ Небесе и земли Царица,/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О Владычице Державная!/ Не престани и на будущее время/ во утверждение на Руси православия// милости и чудеса изливати до века. Аминь.

Аще изволит настоятель, поем на стиховне стихиры Всех русских святых, глас 2.

Подобен: Доме Евфрафов:

Земле Русская,/ граде святый,/ украшай твой дом,/ в немже Божественный// велий сонм святых прослави.

Стих: Господи, Господь наш,/ яко чудно Имя Твое по всей земли.

Церковь Русская,/ красуйся и ликуй,/ се бо чада твоя/ Престолу Владычню// во славе предстоят, радующеся.

Стих: Святым, иже суть на земли Его,/ удиви Господь вся хотения Своя в них.

Соборе святых русских,/ полче Божественный,/ молитеся ко Господу/ о земном отечестве вашем// и о почитающих вас любовию.

Слава, глас и подобен тойже:

Новый доме Евфрафов,/ уделе избранный,/ Русь Святая,/ храни веру Православную,// в нейже тебе утверждение.

И ныне, глас и подобен тойже:

Вышнии лицы,/ Богородице Дево,/ поют с нижними,/ славяще непрестанно// Рождество Твое пречистое.

По Ныне отпущаеши: тропарь Крещения Руси, дважды и святаго единожды.

Тропарь Крещения Руси, глас 8:

Благословен еси, Христе Боже наш,/ Землю Российскую Крещением просветивый,/ людем ея низпослав Духа Святаго,/ ихже и ко спасению приведый,// Человеколюбче, слава Тебе.

Тропарь святаго, глас 4:

Уподобился еси купцу, ищущему добраго бисера,/ славнодержавный Владимире,/ на высоте стола седя матере градов, богоспасаемаго Киева:/ испытуя же и посылая к

Царскому граду уведети православную веру,/ обрел еси безценный бисер – Христа,/ избравшаго тя, яко втораго Павла,/ и оттрясшаго слепоту во святей купели,/ душевную, вкупе и телесную./ Темже празднуем твое успение,/ людие твои суще,/ моли спастися державы твоея Российския начальником и множеству владомых.

Ин тропарь святаго, глас 1:

Яко начальнику Крещения/ и кореню веры Божественныя,/ идолов разрушителю,/ блаженне княже Василие равноапостольне, вопием ти:/ слава вразумльшему тя Христу Богу,/ слава освятившему тя Крещением Своим,/ слава просветившему тобою всю страну Русскую.

Ин тропарь святаго, глас 8:

Правоверия наставниче/ и всея Руси просветителю,/ благочестивый великий княже Владимире,/ святым Крещением всех просветил еси/ и церкви многи славны украсил еси,/ о премудре Василие,/ Христа Бога моли спастися душам нашим.

НА УТРЕНИ

На Бог Господь: тропарь Крещения Руси, дважды. Слава, святаго. И ныне, Крещения Руси.

По 1-м стихословии седален святаго, глас 1:

Яко начальнику и кореню веры и идолов разрушителю,/ блаженне княже, равноапостольне Владимире, вопием ти:/ моли Христа Бога грехов оставление даровати/ празднующим любовию святую память твою.

Слава, и ныне, Богородичен:

Настави нас на путь покаяния, уклоньшияся присно к безпутием зол/ и Преблагаго прогневавшия Господа,/ Неискусобрачная благословенная Марие, прибежище отчаянных человеков,/ Божие жилище.

По 2-м стихословии седален святаго, глас 8:

Научився неизреченною от Бога вышнею мудростию,/ богатно к разуму веры Его достигл еси и к доброте Его скоро притекл еси./ Темже изъяснил еси умныя твоя очи/ и к разуму возвел еси благочестия веры./ Того ради празднующе, глаголем:/ благословен Бог, просветивый светом разумным сердце твое,/ светильниче светлый Василие,/ моли Христа Бога грехов оставление даровати/ чтущим любовию святую память твою.

Слава, и ныне, Богородичен;

Греховный мрак покрывает мя, и студная моя дела без воздержания выну,/ и совестное томление непрестанно мучит мя./ Увы мне, где убо ныне скрыюся?/ К кому ли притек, паки обращу помощь?/ Токмо к Тебе, Богоматери, припадаю и молюся Ти:/ моли выну спастися душам нашим.

По полиелеи величание Пресвятей Троице:

Величаем Тя,/ Триипостасный Владыко,/ верою Православною Землю Русскую озарившаго/ и святых сродников наших/ сонм велий в ней прославльшаго.

Ино величание Пресвятей Богородице:

Величаем Тя,/ Пресвятая Дево Богородице,/ весь мир смирению и чистоте научившую/ и Землю Российскую, яко удел Твой,/ всегда сохраняющую.

Посем поем на оба лика псалом избранный: Благо есть исповедатися Господеви: и величание святому Владимиру:

Величаем тя,/ святый равноапостольный княже Владимире,/ и чтим святую память твою,/ идолы поправшаго/ и всю Российскую землю святым Крещением просветившаго.

По полиелеи седальны Крещения Руси, глас 6:

Кто убо возможет достойную похвалу/ вам принести, святии Кирилле и Мефодие,/ словенских народов апостоли и Богомудрии учителие,/ Землю нашу Христовым учением просветившии?/ Благословен язык, имже насеясте духовная словеса/ во спасение отцев наших,/ с нимиже и мы ныне согласно воспеваем// Жизнодавца Христа.

Слава, глас 8:

Равноапостольнии Владимире и Ольго,/ образ спасения земли Российстей преподасте,/ яко родившеся духом в купели Крещения, последовали есте Христу,/ крестяще люди русския, учаще их оставити идольскую прелесть/ и восприяти попечение о души безсмертней,// темже и со ангелы срадуется дух ваш.

И ныне, Богородичен, глас 4:

Яко необоримую стену и источник чудес/ стяжавше Тя, раби Твои, Богородице Пречистая,/ сопротивных ополчения низлагаем./ Темже молим Тя:/ мир Земли Русстей даруй// и душам нашим велию милость.

Степенна, первый антифон 4-го гласа. Прокимен, глас 4: Вознесох избраннаго/ от людей Моих. Стих: Ибо рука Моя заступит его и мышца Моя укрепит его. Всякое дыхание: Евангелие от Иоанна, зачало 36. По 50-м псалме стихира, глас 8:

Апостолом ревнителя Владимира,/ преблаженнаго отца и учителя, сошедшеся, восхвалим,/ имже Христа Бога познахом/ и, от тьмы к свету приближающеся,/ очи и сердца просвещаем,/ в память его ликовствующе, купно веселимся,/ обретше его вожда правоверна в Царствие Небесное.

Канон Крещения Руси, со ирмосом на 6 и святаго два канона на 8.

Канон Крещения Руси, глас 2.

Песнь 1

Ирмос: Стопами невлажными Израиль прохождаше,/ сечением вод проявляше Крест,/ входом — погребение,/ исходом — честное и Божественное Воскресение/ поя в похвалении Избавителю победную.

Припев: Слава Тебе, Боже наш, слава Тебе.

Велика учителя и мудра сказателя/ требует Церковь на украшение праздника,/ мы же, нищии словом, что речем?/ Обаче, призвавше благодать Святаго Духа,/ победно возславим Крещение Руси.

Прииде Спас, Благодать и Истина,/ и многобожие упразднися в Земли Российстей./ Сего ради в похвалении Избавителю песнь победную поем:/ Господи, слава Тебе.

Канон святаго. Глас 8.

Песнь 1

Ирмос: Посеченый несекомаго пресече,/ и виде солнце землю, юже не виде;/ лютаго врага вода потопи,/ и непроходимое пройде Израиль./ Песнь же воспевашеся:/ Господеви поим, славно бо прославися.

Собезначальное Слово Божие, Иже древле четырем стихиям Творец/ и теми весь мир сотворивыи* <*и теми весь мир сотворивый – сотворивший мир из четырех стихий; в некоторых изданиях вместо «сотворивый» – «связавый»>, связанную страстьми душу мою разреши,/ яко да воспою, ликуя, славнаго князя Василия.

От выспрь сошед, Владыко, невещественно на духовную гору,/ свыше просящим от Тебе обильну светлость душам посли/ достодолжно похвалити чуднаго князя Василия.

Богородичен: Матерем и девам похвала Ты, Владычице,/ рождшая Жизнь, Творца мирови, матерских же болезней не ощутила еси,/ но Мати убо и Дева пребыла еси./ Темже, хваляще Тя, радуйся, вопием Ти.

Ин канон святаго. Глас 6.

Песнь 1

Ирмос: Яко по суху, пешешествовав Израиль/ по бездне стопами,/ гонителя фараона/ видя потопляема,/ Богу победную песнь поим, вопияше.

Приидите, вернии, песнь духовную возопием и прославим Христа,/ Иже светло прославил есть честнаго Владимира, великаго князя.

Иже семя сеющему даруя,/ Ты и мне даруй слово, Дателю благих,/ разрешая ми соуз языка, и обнови, Спасе, к славословлению верно.

Иже волею, а не нуждею к Тебе всех призываеши,/ якоже древле Моисея и Исаию,/ такожде и ныне в сердце возгласил еси вернаго и достохвальнаго князя.

Богородичен: Украшена добротою добродетелей, Богомати Чистая,/ Бога истиннаго зачала еси,/ нас Божественными добродетельми просветившаго.

Песнь 3

Ирмос: Процвела есть пустыня, яко крин, Господи,/ языческая неплодящая Церковь,/ пришествием Твоим,/ в нейже утвердися мое сердце.

Пуста и преизсохши Земля наша бысть,/ идольский бо зной изсуши ю,/ но внезапу потече источник евангельский,/ напаяя всю Русь, якоже рече пророк:/ на жаждущей земли источник водный будет;/ имже и ныне напояем сердца наша.

Якоже по земли роса,/ тако по всей Руси вера простреся, дождь благодатный ороси/ и купель Крещения сыны Российския в нетление облачи;/ от неяже и ныне спасение приемлем.

Ин

Ирмос: Утвердися сердце мое во Господе,/ вознесеся рог мой в Бозе моем,/ разширишася на враги моя уста моя,/ возвеселихся о спасении Твоем.

Яко труба богогласная, возгласи язык твой, блаженне, духовный,/ провозглашаяй всем концем земли Российския Христово правоверное Крещение,/ имже просвещен быв, мир весь просветил еси.

Сияет днесь, Василие, преславная память твоя,/ юже празднуют христоименитии людие,/ тебе похваляюще, своего праотца,/ ихже к свету разумному привел еси.

Богородичен: Сень закона прейде рождеством Твоим, Богородице, благодати пришедши,/ отчу Слову, Христу Богу нашему,/ Бгоже познав, славный князь Церковь Твою светло украсил есть.

Ин Ирмос: Несть свят,/ якоже Ты, Господи Боже мой,/ вознесый рог верных Твоих, Блаже,/ и утвердивый нас на камени/ исповедания Твоего.

Иже Павла просветивый и избранна сотворивый,/ тако и Василия ныне, отца Российскаго, очный недуг отторгнул еси, Милостиве,/ Твоим Крещением.

Константина вернаго подобник явился еси, Христа в сердцы твоем приим,/ и Его заповедем, якоже апостол, всю землю Российскую научил еси.

Божественною силою ты возмогая безбожнаго Перуна, кучу бесовскую сокрушил еси/ и, ко опаши констей того привязав,/ повелел еси воином разбити идола.

Богородичен: Сень святую обрет, Марию Деву,/ Божий сосуд, Владимир, князь великий, апостола Павла ревнитель,/ сей церковь Божественную в Тоя имя воздвигл есть.

Кондак, глас 3.

Подобен: Дева днесь:

Днесь Земля Русская предстоит Богу/ и плод святаго Крещения Ему приносит,/ Ангели, радующеся, славословят,/ и вси святии с Богородицею, ликующе, поют:/ Христос воцарися, Христос прославися./ Велий еси, Господи, и чудна дела Твоя,// Боже наш, слава Тебе.
Икос:

Во едино время вся Земля Русская/ возслави Христа со Отцем и Святым Духом,/ тогда начат мрак идольский от нас отходити/ и заря Православия явися:/ тьма бесовскаго служения погибает/ и солнце евангельское Землю нашу осиявает,/ капища разрушаются, и церкви поставляются,/ идоли сокрушаются, и святыя иконы являются,/ беси убегают, и Крест грады освящает,/ и пастырие словесных овец Христовых/ Безкровную Жертву возносят,/ Апостольская труба и евангельский гром/ вся грады оглашает,/ и фимиам, Богу возносимь, воздух освящает./ Монастыри на горах поставляются,/ и черноризцы являются,/ людие церкви наполняют и, ликующе, поют:/ Христос воцарися, Христос прославися./ Велий еси, Господи, и чудна дела Твоя,// Боже наш, слава Тебе.

Седален, глас 5:

Како похвалим тя, отче честный,/ славный в земных владыцех, Владимире?/ Како уверовал еси?/ Како ти сердце отверзеся?/ Како вниде в тя страх Божий?/ Како возгореся любовию ко Христу?/ Како вселися в тя разум превыше земныя мудрости,/ еже возлюбити Невидимаго?/ Не видел еси Христа, ни ходил еси по Нем,/ како ученик Его явися?/ Откуду повея тебе благоухание Святаго Духа?/ О, дивное чудо!/ Инии царие и властителие,/ видяще вся, бываемая от святых мужей,/ не веровавше, но паче на страдания и муки предаваша их./ Ты же, блаженне, без всех сих пришел еси ко Христу,/ токмо от благаго смысла и острым умом разумев,/ яко есть Бог Един Творец,/ и вниде во святую купель./ И еже иным юродство мнится,/ тебе сила Божия вменися,/ Крест — оружие мира, непобедимая победа.

Ин седален, глас 2:

В молитвах бдяй присно радостною душею, Василие,/ того ради почерпл еси Духа премудрости от источника, сходящаго свыше./ Тем верою просияв, яко солнце, моляся Христу непрестанно,/ ускори, Щедрый, и потщися спасти от прегрешений мир.

Слава, и ныне, Богородичен:

Богородице Безневестная Чистая, яже без семене рождшая всех Владыку,/ Того со Ангелы моли избавитися нам от всякаго недоумения/ и дати умиление и свет душам нашим/ и согрешений очищение, яже едина вскоре заступающи.

Песнь 4

Ирмос: Услышах, Господи, слух Твой и убояхся,/ разумех дела Твоя, и дивихся, и возопих:/ слава силе Твоей, Господи.

Не в худей и не в неведомей земли/ услышан бысть слух Твой, Господи, но в Русстей,/ в нейже Крещением неверие искоренися,/ и ныне ведома и слышима есть всеми концы земли.

Новое имя приемши Русь Крещением,/ имже написася в книге жизни, Русь Святая./ И по всей земли ныне слышится:/ слава силе Твоей, Господи.

Ин

Ирмос: Пророк Аввакум умныма очима/ провиде, Господи, пришествие Твое,/ тем и вопияше:/ от юга приидет Бог./ Слава силе Твоей, слава снизхождению Твоему.

Светло бысть и сладко по облаце, имже покрывашеся Небесное солнце;/ весела же и радостна весна по зимней скорби;/ ты же по облаце идольскаго мрака/ Крещением, яко солнце светлое, возсиял еси нам, Василие.

Павел* <*в некоторых изданиях – Савл> фарисей, к Дамаску грядый,/ малым блещанием великаго Света ослеплен, Крещением же просветися,/ емуже ты подобник был еси, славне,/ Корсуня дошед, очный мрак отгнал еси.

Богородичен: Ты явилася еси, Дево, корень ненапоен, прозябая отпущение,/ плод светоносный рождши, Христа Бога нашего;/ дряхлующую страстьми душу мою просвети/ и испроси грехов оставление.

Ин

Ирмос: Христос моя сила,/ Бог и Господь,/ честная Церковь/ боголепно поет, взывающи,/ от смысла чиста о Господе празднующи.

Чудо страшное, и преславное, и неизглаголанное совершает Владыка Христос:/ обновляет бо Божественным Крещением всю Российскую землю/ и просвещает князя Василия.

Светло приидите и достолепно возгласите,/ сынове российстии, ко отцу нашему Владимиру,/ и память его верно вси да празднуем светло.

Отчее нечестие отгнал еси,/ всечестныя же твоея праматере правоверную веру возлюбил еси,/ равне апостолом Христовым, княже великий Владимире.

Богородичен: Яко дверь, приводящую к Божественному входу рая светлаго,/ яко мысленное место священия,/ яко доброту Иаковлю, Деву ублажаем.

Песнь 5

Ирмос: Просвещение во тьме лежащих,/ спасение отчаянных, Христе, Спасе мой,/ к Тебе утреннюю Царю мира,/ просвети мя сиянием Твоим,/ иного бо, разве Тебе, бога не знаю.
Солнце, красующеся, к высоте восходит/ и, радующеся, землю согревает,/ взыде бо нам в Крещении Руси Праведное Солнце, Христос,/ и всех, верующих в Него, спасает.

Бывшим нам слепым и Истиннаго Света неведящим,/ посла Господь свет заповедей Своих, по пророчеству:/ реку не людем Моим: людие Мои есте, —/ и тии рекут: Господь Бог наш Ты еси,/ иного разве Тебе не знаем.

Ин

Ирмос: Господи Боже наш, мир даждь нам,/ Господи Боже наш, стяжи* <*стяжи – сохрани, спаси> ны,/ Господи, разве Тебе, иного не вемы,/ Имя Твое именуем.

Радуйся и красуйся духом, Российский царю Василие,/ изрядныя бо ветви богосадныя ко Христу принесл еси,/ богоизрядный твой плод, Бориса славнаго и Глеба благочестиваго,/ с нимиже предстоя Христу, о нас молися.

Дивный прорече Исаия на Иерусалим:/ будет яве гора Господня и дом на верх гор./ Праведне же на тебе разумехом благодать Духа:/ дом бо Владыце создал еси на версех гор.

Богородичен: Проповедует о Тебе чудный Исаия Духом,/ Девою хотящу родити Христа без семене,/ Давид же, Твой прадед, дивно провозвести Твоя величествия:/ спасе бо нас, яко Милостив.

Ин

Ирмос: Божиим светом Твоим, Блаже,/ утренюющих Ти души любовию озари, молюся,/ Тя ведети, Слове Божий,/ истиннаго Бога,/ от мрака греховнаго взывающа.

Днесь Ангели Божии радуются светло на Небесех в память твою святую:/ спасл бо еси нас от всякаго лукавства/ и жертв бесовских люди многи избавил еси и всю землю Российскую.

Рыдает бесовское множество и темное соборище,/ видяще на земли попираемы идолы, иже на погибель воздвиженныя человеком,/ ихже Божиим повелением, Василие, сокрушил еси.
Радуйся и веселися, рабе Христов,/ княже великий и мудрый, молебниче о душах наших:/ тобою бо мы вси избавлени есмы бесовския лести./ Темже – радуйся – вопием ти.

Богородичен: Чистотою сияющи издалеча,/ Божественное уготование Владычне, Всепетая, бывши:/ Ты бо едина показалася еси Мати сущи Богу/ и руками яко Младенца Того носивши.

Песнь 6

Ирмос: В бездне греховней валяяся,/ неизследную милосердия Твоего призываю бездну:/ от тли, Боже, мя возведи.

Совлечеся Русь риз ветхих,/ сложи одежды тленныя, отрясе прах неверия/ и, вшедши во святую купель, родися от воды и Духа./ Мы же, в бездне греховней валяющеся,/ токмо покаянием и милосердием Божиим к Жизни Вечней возводимся.

Иже во Христа крестихомся,/ не от крове, ни от похоти плотския,/ но от Бога родихомся Святым Духом во святей купели,/ аще же, согрешающе, умерщвляемся,/ покаянием паки милосердие Божие и жизнь обретаем.

Ин

Ирмос: Яко воды морския, Человеколюбче,/ волнами житейскими обуреваюся./ Темже, яко Иона, тако вопию Ти:/ возведи от тли живот мой, Благоутробне Господи.

Благочестия ревнитель славнаго царя Константина ты был еси, Василие,/ просветившаго Крещением еллинский род,/ ты же духовною банею люди твоя пресветло обновил еси.
Осладив любовию Христовою душу и разумныя прием криле,/ прелетел еси идольский мрак и разгнал еси тьму зловерия, блаженне,/ вселився в чертог Спаса всех Бога.

Богородичен: Благодушствует Церковь Российская днесь и правоверных собори/ в память пресветлую Василия, ублажающе Твое безсеменное рождество, Дево,/ и, прилежно Сыну Твоему молящеся, зовут:/ Тя величаем.

Ин

Ирмос: Житейское море,/ воздвизаемое зря напастей бурею,/ к тихому пристанищу Твоему притек, вопию Ти:/ возведи от тли живот мой,/ Многомилостиве.

Силою Божиею попран есть сатана душегубец и лестныя его жертвы:/ победника бо явил нам есть Христос, Василия, вернаго князя,/ сокрушити и поврещи того под ноги наша.

Спасе прежде Господь рукою Моисеовою Израиля от работы,/ Тойже и ныне рукою Василия, вернаго князя,/ всех нас от лести идольския спасл есть.

Достойно ти взываем и вопием вси:/ радуйся, всечестне преблаженне, тя бо избавителя с Богом, Василие, имамы./ Не презри рабов твоих, но присно сохраняй нас.

Богородичен: Обретохом, Пречистая, Тобою спасение, Дево Препетая:/ Егоже желают Ангели на Небесех видети,/ Сей ныне видится в недрех Твоих Младенец, Бог наш.

Кондак, глас 8:

Подобствовав великому апостолу Павлу, в сединах, всеславне Владимире,/ вся, яко младенческая, мудрования, яже о идолех тщания, оставль,/ яко муж совершенный, украсился еси Божественнаго Крещения багряницею,/ и ныне, Спасу Христу в веселии предстоя,/ моли спастися державы Российския начальником и множеству владомых.

Икос:

Просветивый древле Израиля Моисейским законом,/ просветил же еси мир явлением Твоего пришествия, Христе Боже,/ богогласныя Твоя ученики послал еси проповедати по странам/ еже от Девы безсеменное рождество Твое/ и тем повелел еси крестити во Имя Отца, и Сына, и Святаго Духа./ Обветшавшу же видя страну Российскую грехом,/ Дух Твой послал еси в крепкоразумнаго душу славнаго Владимира,/ познати Тебе, Единаго от Троицы Христа Бога,/ и Твоим Крещением просветит избранныя Твоя/ и от Тебе порученныя ему люди, и привести к Тебе верою вопиющия:/ избави Твое достояние от сопротивных поган,/ российския начальники и множество владомых.

Ин кондак, глас 8:

Изрядному воеводе и правоверному,/ благодарственная восписует ти вся Русь, Василие, имущи тя начальника и заступника,/ яко избавил еси нас от веяния скверны и лести, темже ти вопием:/ радуйся, великий княже Владимире преблаженне.

Ин кондак, глас 4:

Отеческу прелесть, идолы, яко суетни, отверг,/ Христа, всех истиннаго Бога, Царя и Благодателя, познал еси./ Темже и люди, изрядны Тому, святым Крещением просветил еси,/ преславне Владимире./ Сего ради почитаем тя,/ яко Троице служителя,/ Христа моли даровати нам велию милость.

Ин икос:

Иже от тьмы нечестия уклонился еси/ и невечерняго Сияния, Христа, достигл еси,/ отнюдуже и омраченныя безбожием Божественною любве банею освятил еси,/ Троицу славити во Бдинем Божестве пресветло научил еси, всеблаженне Владимире./ Но, яко имея дерзновение к Богу,/ многообразных зол избавитися нам Христа моли/ и даровати нам велию милость.

Песнь 7

Ирмос: Трие отроцы в пещи Троицу прообразивше,/ Царя и Господа проповедаша/ и прелесть идольскую упраздниша, вопиюще:/ благословен еси, Боже отец наших.

Благословен Господь Бог наш,/ Иже не попусти до конца людем Своим идольским мраком одержимым быти,/ но Сыном Своим вся языки спасе,/ Крещением обновляя в Вечную Жизнь.
Вся Земля Русская крестися во Имя Отца и Сына и Святаго Духа,/ и во всех градех и весех славится Святая Троица,/ малии и велицыи прославляют Бога, якоже рече пророк:/ уведят Мя от мала и до велика.

Ин

Ирмос: Халдейския пещи/ всепагубную силу угасивше/ образом Ангела снизшедшаго,/ Зиждителю юноши взываху:/ благословен еси и хвальный, Боже отец наших.

Праотчи богоистканныя мя ризы враг душегубец обнажил есть,/ Иисус же Безначальный, явлейся плотию, очистив водою Духа, паки мне подаде ю,/ Егоже познав, славне Владимире, веселишися, вопия:/ благословен Бог отец наших.

Моисейский сохранив закон, Даниил Боговидения сподобися;/ праотеческия же ты поправ идолы,/ не яко во мраце, но в большей славе, разумно узрел еси Христа со Отцем и Духом,/ решением же просвещен, веселишися, вопия:/ благословен Бог отец наших.

Богородичен: Божественныя обнажи одежды враг, прельстив первозданнаго прадеда Твоего, Дево,/ из боку же Твоею чистою и неискусобрачною пришед Спас, сладкий мой Иисус,/ на Негоже потек, аки на Адама, но о Бога образися* <*образися – ударился, столкнулся> и сокрушися люте./ Мы же Сыну Твоему зовем:/ благословен Бог отец наших.

Ин

Ирмос: Росодательну убо пещь/ содела Ангел/ преподобным отроком,/ халдеи же опаляющее/ веление Божие мучителя увеща вопити:/ благословен еси, Боже отец наших.

Елены ты новыя любовию известился еси, внук быв преблаженныя Ольги,/ Константин же Великий новый явился еси, Христу, Василие, вопия:/ благословен еси, Боже отец наших.
Лютый льстец двизашеся на христианы воевати,/ Превеликий же Господь в Корсуне тя просвещает,/ и Крещению Божественному сподобляет,/ и Царствие Небесное тебе даровал есть.

Обветшавшую лесть бесовскую прогнал еси, яко великий Христов ученик,/ обновив, просветил еси всех нас вопити Господеви немолчно:/ благословен Бог отец наших.

Богородичен: От родов Тя всех избрал есть Бог Превечный прежде век/ и, в последния дни плоть прием от Тебе,/ совершен вкупе явися Бог и Человек, Приснодево.

Песнь 8

Ирмос: Ангели непрестанно воспевают,/ человецы присно славословят,/ и вся тварь/ да благословит Господа.

Да славит и благословит Церковь Русская хвалимаго непрестанно от ангел Господа,/ яко призре на люди Своя и Сам спасе нас,/ пострадав за нас плотию, сошед во ад, и с Собою вся воскреси.

Врази бывше Богу, в Крещении сыны Его нарекохомся,/ сего ради благословим Христа, от ребр Его пиюще источник нетления,/ от негоже приобщаемся Жизни Вечныя.

Ин

Ирмос: Покрываяй водами превыспренняя Своя,/ полагаяй морю предел песок/ и содержай вся,/ Тя поет солнце, Тя славит луна,/ Тебе приносит песнь вся тварь,/ яко Содетелю всех во веки.

Род праведных благословится, Божественная вещаша уста, еже на тебе сбыстся, блаженне:/ семя бо святолепное и богоизбранное принесл еси Христу,/ непобедимыя мученики, имиже просветил еси землю Российскую,/ ихже похваляюще с тобою, превозносим Христа во веки.
Мати всех градов воистинну царства твоего град явися Киев,/ в немже Христос прежде со Отцем и Духом прославися/ твоею праматерию и тобою, блаженне,/ идеже мужественное твое тело лежит светло в церкви Владычицы,/ мы же, людие твои, хваляще, поем Христа во веки.
Богородичен: Безначальное сияние и Слово Отчее проповедаша неложно пророчестии гласи,/ из Тебе хотящаго без тли родитися Еммануила,/ Бога же и Человека, крепкое языков чаяние,/ Емуже яко Мати молися спастися нам.

Ин

Ирмос: Из пламене преподобным росу источил еси/ и праведнаго жертву водою попалил еси:/ вся бо твориши, Христе, токмо еже хотети./ Тя превозносим во вся веки.

От безбожных идолов всех нас избавил еси,/ ко Христу же Богу привел еси, отче, верных князей,/ наказателя стад твоих, Христа поющих во веки.

Константин новый ты известился еси во всей Российстей земли, блаженне Василие:/ ты бо имя Христово изъяснил еси,/ Егоже превозносим во веки.

Царю вечному ныне ты предстоиши и десницею Его венчан еси,/ молися Ему за недостойныя рабы твоя,/ яко да поем Его и превозносим во веки.

Богородичен: Облак Слова Ты еси, Препетая, и свеща солнечная,/ колесница многоценная, девическое возвышение, гора тучная и усыренная,/ пребываеши Пречистая Дева Господоименитая.

Песнь 9

Ирмос: Радуйся, Всецарице, земнородных похвало,/ в последняя дни Спасение наше рождшая,/ да от древния клятвы человеческий род свободиши,/ темже вси немолчно Тя величаем.

Кое благодарение Богу воздадим?/ Яко Крещением прелести греховныя избавляемся,/ и Покров Заступницы Усердныя Земли Российстей обретаем./ Темже вси немолчно Бога величаем.

Кто бог велий, яко Бог наш?/ Ты еси Един, творяй чудеса,/ вседержительною десницею Твоею от всех бед нас избавляяй/ и в удел избранный Царице Небесней Землю Русскую вверяяй./ Темже вси немолчно Богородицу величаем.

Ин

Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.

Давид обретеся прежде Израилю державный царь и люди спасе,/ боги иноязычныя низложив, Духом Божия Сына проповеда;/ ты же в Троице познал еси Бога, блаженне Василие, Егоже величаем.

Да торжествуют днесь весело память твою/ святолепно в церкви Божия Матере богоизбраннии людие, юже любезно украсил еси,/ в память вечную твоего преставления, небо земное,/ в немже почивая, ожидаеши всестрашныя трубы Архангеловы, блаженне./ Тем тя присно величаем.

Богородичен: Духом Божественным распалаеми, вси роди, любовию блажим Тя, Богородице:/ Ты бо клятву праматере разрушила еси./ Прилежно же поем Божия Слова,/ Того бо, неопально во чреве Твоем приемши, родила еси плотию./ К Немуже молися,/ избавится верному Твоему стаду от всякия нужды и печали.

Ин

Ирмос: Бога/ человеком невозможно видети,/ на Негоже не смеют чини Ангельстии взирати;/ Тобою бо, Всечистая, явися человеком/ Слово воплощенно,/ Егоже величающе,/ с Небесными вои Тя ублажаем.

Сладок, якоже финикс высок изращаемь,/ и, цвет творя масличный, ветви многоплодныя,/ ты бываеши винное изращение, кисти две созрелы – мученики принося,/ Романа и Давида честныя.

Лицы князей ныне благородных предстоят,/ от тебе благочестие носяще, с людьми верными хваляще тя:/ наставниче и скорый заступниче, поминай всех нас,/ яко да в мире тобою живот обрящем.

Людие Российстии, приидите, снидитеся в честней церкви Владимира святаго,/ нареченнаго Василия, преблаженнаго великаго князя, угодника Христова преславнаго,/ и приимите живот и спасение, благодать и велию милость.

Богородичен: Бога, Дево, Ты родила еси на земли,/ во плоти соединение бысть Безплотное,/ во единей Ипостаси и во двою естеству,/ да спасет всех нас, кланяющихся верно, яко Богородице Пречистей.

Светилен Крещения Руси:

Днесь Свет велий от Креста возсия,/ просвещая души наша,/ радость и веселие даруя всем нам,/ празднество Крещения Руси.

Светилен святаго.

Подобен: Жены, услышите:

Светильницы, просветивше вселенную всю благочестием и верою,/ вы явистеся воистинну, боговенчанне Владимире с праматерию Еленою славною./ Вас возлюбившаго Христа и мы славословим, дивнаго во святых.

Слава: В Руси днесь учитель явися, Христову Православную веру возлюбив,/ изъят люди своя от тьмы неведения и приведе ко свету Богоразумия./ Сего ради показася наставник и начальник Божия благодати.

И ныне, Богородичен:

Во двою волю и естеству, Пренепорочная,/ во единой же Ипостаси раждаеши Бога неизреченно,/ нас ради обнищавшаго до распятия хотением/ и даровавшаго нам богатство Божественное, Богомати Дево.

На хвалитех стихиры на 6: Крещения Руси 2 и святаго 4.

На хвалитех стихиры, глас 6:

Похвальными гласы воспевает/ Иерусалим апостолов двоенадесятицу,/ Римская страна хвалит Петра и Павла,/ Асия, Ефес и Патмос — Иоанна Богослова,/ Индия — Фому, Египет — Марка./ Вся страны, гради и людие/ славят коегождо их учителя,/ имиже увероваша во Иисуса Христа, Сына Божия./ Земля же Русская благословением Андрея Первозваннаго красуется./ Восхвалим с ним и нашего просветителя,/ равноапостольнаго Владимира,// Руси крестителя.

Подобник великому Константину был еси,/ равноапостольне княже Владимире,/ той бо в еллинех и римлянех царство Богу покори,/ ты же Землю Русскую крести;/ той с материю своею Еленою,/ Крест во Иерусалиме обретшею,/ во всем мире веру утверди,/ ты же с праматерию твоею Ольгою,/ Крест от Константина града принесшею,/ знамение сие на Руси водрузи// и насади веру во Единосущную Троицу.

На хвалитех стихиры святаго, глас 4.

Подобен: Дал еси знамение:

Оружие крепкое/ князю нашему дал еси, Господи,/ Крест Твой честный,/ имже поживе на земли праведно,/ просияв благочестием,/ и Царству Небесному сподобися милосердием Твоим./ Темже Твое человеколюбное смотрение славим,/ Иисусе Всесильне,/ Спасе душ наших.

Дал еси, Человеколюбче,/ благочестивому Твоему угоднику/ Соломонову мудрость, Давидову кротость/ и апостольское православие,/ яко царей Царь и господствующих всех Господь./ Темже Твое человеколюбное смотрение славим,/ Иисусе Всесильне,/ Спасе душ наших.
Первый повинул еси багряницу,/ приснопомнимый княже, волею Христу,/ Того познав Бога/ и яко Царя всех Благодетеля,/ победы творя всякому началу/ и власти належашим./ Отсюду тебе, христолюбче, царство исправил есть/ Иисус Человеколюбец,/ Спас душ наших.

Слава, глас 2:

Не от человек звание приял еси,/ но яко чудный Павел,/ приял же паче, славне, сие свыше,/ Владимире апостоле, от Христа Бога./ Ибо знамением Креста оградився/ и тем уловлен быв,/ яко предобрая ловитва,/ сим победитель на видимыя и невидимыя враги явился еси непобедим./ Темже молим тя,/ яко молитвенника тепла, земнороднии,/ по достоянию память твою почитающе,/ со дерзновением просити нам просвещение, и очищение,/ и велию милость.

И ныне, Богородичен, глас тойже:

Присно страна Российская/ о Тебе хвалится и веселится,/ имущи Тя Заступницу непостыдную/ и стену нерушимую,/ не оскудей и ныне, Владычице,/ избавляти Твоя люди от всех бед.

Славословие великое.

По славословии тропарь Крещения Руси. Слава, святаго.

И ныне, глас 4:

К Заступнице страны нашея,/ Приснодеве Богородице, притецем/ и к первописанней иконе Ея ныне припадем,/ с верою зовуще из глубины души:/ о Мати Божия, спаси Землю Русскую,/ исцели сокрушение ея/ и верныя люди утеши.

Ектения и отпуст, на немже поминаем святаго равноапостольнаго князя Владимира. И поем многолетны.

НА ЛИТУРГИИ

Антифоны праздника Крещения Руси

Антифон 1, глас 1:

Стих 1: Блажени, ихже оставишася беззакония/ и ихже прикрышася греси.
Молитвами Богородицы, Спасе, спаси нас.

Стих 2: Блажени непорочнии в путь,/ ходящии в законе Господни. Молитвами Богородицы:

Стих 3: Радуйтеся, праведнии, о Господе,/ правым подобает похвала. Молитвами Богородицы:

Стих 4: Веселитеся о Господе и радуйтеся, праведнии,/ и хвалитеся, вси правии сердцем. Молитвами Богородицы:

Слава, и ныне: Молитвами Богородицы:

Антифон 2, глас 2:

Стих 1: Блажен язык, емуже есть Господь Бог его,/ люди, яже избра в наследие Себе.
Спаси ны, Сыне Божий, просветивый нас Крещением, поющия Ти: аллилуия.

Стих 2: Проси от Мене, и дам Ти языки достояние Твое/ и одержание Твое концы земли. Спаси ны:

Стих 3: Спаси люди Твоя, и благослови достояние Твое,/ и упаси я, и возми я до века. Спаси ны:

Стих 4: Господь просвещение мое и Спаситель мой,/ кого убоюся? Спаси ны:

Слава, и ныне:

Единородный Сыне и Слове Божий, безсмертен Сый,/ и изволивый спасения нашего ради/ воплотитися от Святыя Богородицы и Приснодевы Марии,/ непреложно вочеловечивыйся;/ распныйся же, Христе Боже, смертию смерть поправый,/ Един Сый Святыя Троицы,/ спрославляемый Отцу и Святому Духу, спаси нас.

Антифон 3, глас 8:

Стих 1: Глас Господень на водах, Бог славы возгреме,/ Господь на водах многих.
Тропарь, глас 8: Благословен еси, Христе Боже наш,/ Землю Российскую Крещением просветивый,/ людем ея низпослав Духа Святаго,/ ихже и ко спасению приведый,// Человеколюбче, слава Тебе.

Стих 2: Дух Твой Благий/ наставит мя на землю праву. Благословен еси, Христе Боже наш:

Стих 3: Воскресни, Боже, суди земли,/ яко Ты наследиши во всех языцех. Благословен еси, Христе Боже наш:

Стих 4: С Небесе призре Господь,/ виде вся сыны человеческия. Благословен еси, Христе Боже наш:

Вход.

Входный стих: Призри с Небесе, Боже, и виждь, и посети виноград сей, и утверди и, егоже насади десница Твоя.

Припев: Приидите, поклонимся и припадем ко Христу: спаси ны, Сыне Божий, просветивый нас Крещением, поющия Ти: аллилуия.

По входе: тропарь Крещения Руси и святаго. Слава: кондак святаго. И ныне: кондак Крещения Руси.

Вместо Трисвятаго поем: Елицы во Христа крестистеся, во Христа облекостеся. Аллилуия.
Прокимен Крещения Руси, глас 3: Господь просвещение мое/ и Спаситель мой, кого убоюся?

Стих: Господь Защититель живота моего, от кого устрашуся?

Прокимен святаго, глас 3: Пойте Богу нашему, пойте,/ пойте Цареви нашему, пойте. Апостол, Деяний, зачало 42 и к Галатом, зачало 200.

Аллилуиа, глас 4: Елицы во Христа крестистеся, во Христа облекостеся. Аллилуия. Таже святаго, аллилуия, глас 6: Вознесох избраннаго от людей Моих. Стих: Ибо рука Моя заступит его и мышца Моя укрепит его.

Евангелие от Матфеа, зачало 116, и от Иоанна, зачало 35.

Причастен: Явися благодать Божия, спасительная всем человеком. И святаго: В память вечную будет праведник, от слуха зла не убоится.

Молитва на молебне в память Крещения Руси

Триипостасный Боже, Отче Вседержителю, Сыне Единородный, Спасителю мира, и Душе Святый, просвещаяй и освящаяй племена и народы! Иже и владыку Земли Русския, князя Владимира к свету истинныя веры наставивый, и тем всю страну нашу Крещением просветивый, и сонмом святых, яко пресветлым звездам, небо Церкве Русския украсившим, возсияти даровавый! И нам, смиренным и недостойным чадом их, ныне предстоящим славе Твоей и благодарственное молебное пение приносящим в сей день Крещения Руси, великую милость даровавый, еже славити, хвалити и благодарение приносити Тебе за вся благодеяния, бывшая на Руси от лет древних и до ныне. Призри на ниву Твою, Церковь Святую, и на отечество наше, приносящих Тебе, якоже прекрасный плод спасительнаго сеяния Слова Твоего, лики святых. Тии бо послужиша людем своим верою, надеждею и любовию, образом слова и жития указующе нам путь к совершенству по заповеди Христовой: будите убо совершени, якоже и Отец ваш Небесный совершен есть. Сохраняюще сие святое наследие их, молимся Ти, Жизнодавцу: спаси и помилуй нас, мир миру Твоему даруй и всему созданию Твоему, егоже по грехом нашим сыны века сего обдержат страхом смерти. Вемы бо, яко не хощеши смерти грешников, но еже обратитися и живым им быти; призри на нас, во гресех пребывающих, отврати гнев Твой, праведно движимый на нас, даруй нам покаяние и Твоим неизреченным милосердием помилуй нас. Приими молитвы и труды наша, о умножении любве среди всех людей мира сего. Землю Русскую огради, власти умудри, вся утеши и обрадуй, Церковь Твою возрасти, достояние Твое соблюди, мужи и жены, и младенцы благодатию просвети, и вся люди Твоя в Православии и благочестии утверди молитвами Пречистыя Твоея Матере, силою Честнаго и Животворящаго Креста и Всех святых, в земли нашей просиявших, да в единении веры и любве славим Тя, Отца и Сына и Святаго Духа, во веки веков. Аминь.

Если праздник случится в Неделю. На Господи воззвах, стихиры на 10: воскресны 3, Крещения Руси 3 и святаго 4. Слава, святаго. И ныне, догматик гласа. Прокимен дня и чтения три: Крещения Руси 2 и святаго 1. На литии стихира храма, святаго и Крещения Руси. Слава, Крещения Руси. И ныне, Богородичен. На стиховне стихиры октоиха. Слава, святаго. И ныне, Богородичен. Аще изволит настоятель, поем Слава: Всем Русским Святым: Новый доме Евфрафов: И ныне: Вышнии лицы: По Ныне отпущаеши: тропарь Крещения Руси, дважды: и тропарь святаго единожды. На Бог Господь: тропарь воскресный, дважды. Слава, святаго. И ныне, Крещения Руси. На полиелее величание Крещения Руси и святаго. Ипакои гласа и седальны святаго: Яко начальнику: Научився неизреченною: Слава, Крещения Руси: Равноапостольнии Владимире и Ольго: И ныне, Богородичен: Яко необоримую стену: Канон воскресный с ирмосом на 4, Богородице на 2, Крещения Руси на 4 и святаго на 4. По 3-й песни, кондак и икос Крещения Руси, кондак и икос святаго. Седален Крещения Руси. Слава, седален святаго. И ныне, Богородичен. По 6-й песни, кондак и икос воскресный. По 9-й песни, Ексапостиларий воскресный и светилен святаго. Слава, ин светилен святаго. И ныне, светилен Крещения Руси. На хвалитех стихиры воскресны 4, Крещения Руси 2 и Святаго с припевами с вечерней стиховны 2. Слава, стихира евангельская. И ныне: Преблагословенна еси: По великом славословии тропарь воскресный. На 1-м часе тропарь воскресный: Слава, тропарь Крещения Руси. И ныне, Богородичен часа. Кондак Крещения Руси. На 3-м часе тропарь воскресный. Слава, тропарь святаго. И ныне, Богородичен часа. Кондак святаго. На 6-м часе тропарь воскресный. Слава, тропарь Крещения Руси. И ныне, Богородичен часа. Кондак воскресный. На Литургии: Блаженна гласа, на 4: И от канона Крещения Руси песнь 3-я на 4: И святаго песнь 6-я на 4. По входе тропарь воскресный, Крещения Руси и святаго. Кондак воскресный: Слава, святаго: И ныне, Крещения Руси. Прокимен и аллилуарий, Крещения Руси и святаго. Апостол и Евангелие, Крещения Руси и воскресное под зачало, таже святаго. Причастен, Крещения Руси и святаго.