Служба прпп. Кириллу и Марии

Месяца септемвриа в 28-й день
Преподобных Кирилла и Марии,
родителей преподобнаго Сергия Радонежскаго
На велицей вечерни
Блажен муж: 1-й антифон. На Господи, воззвах: стихиры, глас 8.
Подобен: О, преславнаго чудесе:

Буди благословенна, земле Ростовская,/ в малем селении Варнице/ благочестивую чету всему миру явившая,/ Кирилла и Марию приснопамятных,/ добрый образ честнаго супружества,/ достойныя родители Сергия Великаго./ Тии бо ныне Престолу Божию/ вкупе предстояще,/ молятся о спасении душ наших.
Именитии и славнии/ боярскаго рода наследницы,/ князем ростовским вернии служителие,/ всехвальнии Кирилле и Марие,/ безвестную Варницу лепоте градстей предпочетши,/ идеже благочестно поживше,/ воистинну древо доброплодное явистеся,/ плод прекрасный израстивше Сергия Великаго и досточуднаго.
Преподобне отче Кирилле,/ печальника земли Русския благословенный родителю,/ в годину тяжких испытаний,/ многочастне в стан неверных князем ростовским сшествуя,/ благая Отечеству и Церкви/ устрояти вспомоществовал еси./ Ныне же в селениих Небесных водворяяся,/ молися Господу/ да спасет от работы греховныя души наша.
Преподобная мати Марие,/ благочестием и целомудрием сияющи,/ житием твоим Богу угодила еси,/ Той же сотвори тя достойну/ избранный сосуд Духа Святаго чревоносити/ и служителя усерднаго Святыя Троицы миру явити./ Ныне же с ним в селениих праведных водворяющися,/ молися Господу/ спастися душам нашим.
Слава, глас 5:
Приидите, вернии,/ похвальными словесы родители Сергия преподобнаго восславим,/ достохвальную чету, добрейшия супруги,/ таковому младенцу сподобльшияся быти родители./ Бог предуготова я к дивному сему рождеству,/ быста бо угодницы Божии,/ праведницы пред Ним и людьми,/ евангельскому гласу возследницы/ и всякими добродетельми украшеннии,/ иже и ныне предстоят Престолу Святыя Троицы/ и молятся о душах наших.
И ныне, Богородичен.
Вход. Прокимен дне. Чтения преподобническая.
На литии стихиры, глас 3:
В храме стоящей Марии блаженней,/ и глаголы Евангелия готовей слышати,/ внезапу взыграся младенец во чреве ея/ и гласом велиим возопи,/ благовестника Слова Божия себе предзнаменуя.
В храме стоящей Марии всехвальней,/ прежде даже не певаемей песни Херувимстей,/ паки во утробе ея младенец возгласи,/ со Ангелы прославляя/ грядущаго на вольная страдания Христа Жизнодавца.
В храме стоящей Марии преславней,/ иерею же Святая святым возгласившу,/ се уже третие возопи младенец во утробе ея,/ пророчески себе назнаменуя/ благоговейнаго служителя тайн Тела и Крови Господних.

Слава, глас 8:
Что убо отроча сие будет/ в страсе и трепете кийждо друг друга вопрошаху/ слышавшии трикратное младенца возглашение./ Ты же, Марие блаженная,/ в знамении сем предзрела еси избрание твоего чада/ на служение Триединому Богу/ и поклонение Ему в дусе и истине.
И ныне, Богородичен.
На стиховне стихиры, глас 8:
О веры славныя, о любве благия!/ Всечестнии Кирилл и Мария,/ яко же и во дни древния/ Анна, мати Самуила пророка,/ в служение и дар Богу, Дарователю всяческих благ,/ прежде даже не родитися их младенцу,/ в совете своем того приносят.
Стих: Честна пред Господем/ смерть преподобных Его.
Богомудрии Кирилле и Марие,/ чадо ваше Варфоломея,/ иже есть сын радости, нарекли есте,/ той бо воистинну Российстей Земли явися/ радование, скорый помощник/ и преславный чудотворец.
Стих: Что воздам Господеви о всех,/ яже воздаде ми?
Промышлением Божиим водимии,/ преподобнии Кирилле и Марие,/ в землю Радонежскую преселистеся,/ юже и добродетельми вашими украсили есте,/ подвиги благочестия показавше,/ и люди в ней живущия,/ путем Христовым шествовати поучали есте, блажении.
Слава, глас 4:
В подвизе родительстем добре трудившеся, святии,/ в нем же и чада ваша,/ Петра, Стефана и Варфоломея избраннейшаго,/ в ревностнем служении Триединому Богу/ и Пречистей Божией Матери воспитасте./ Ныне и нам молитвами вашими помозите, блажении,/ путем Христовым неленостно шестовати.
И ныне, Богородичен.
Тропарь, глас 3:
Блаженств Христовых причастницы,/ честнаго супружества и попечения о чадех добрый образе,/ праведнии Кирилле и Марие,/ плод благочестия, Сергия преподобнаго, нам явившии,/ с ним же усердно молите Господа/ низпослати нам дух любве и смиренномудрия,/ да в мире и единомыслии/ прославим Троицу Единосущную.
На утрени
На Бог Господь: тропарь преподобным, дважды. Слава, и ныне, Богородичен.
По 1-м стихословии, седален, глас 5:
Благословенна буди, достойная супружеская чето,/ всехвальнии Кирилле и Марие,/ матери бо пророка Самуила, Анне подражавшии,/ и яко та, такожде и вы младенца, аще родится мужеска пола,/ Богу служити в совете своем положили есте.
Слава, и ныне, Богородичен:
Величия Твоя, Богоблагодатная, кто исповесть?/ Бога бо плотию родила еси,/ ключи девства нерушимы сохраньши/ и чистотою богоприятнаго существа Твоего вся Небесныя силы превозшедши./ Темже песньми немолчными восхваляем Тя,/ Едина Благословенная.

По 2-м стихословии седален, глас 4:
Страннолюбия добродетель явисте, святии,/ в дому бо вашем на всяк день,/ вси требующии помощи прибежище и любовь, яже во Христе, обретаху.
Слава, и ныне, Богородичен:
Милосердия двери отверзи нам, Благословенная Богородице,/ надеющиися на Тя, да не погибнем,/ но да избавимся Тобою от бед,/ Ты бо еси спасение рода христианскаго.
По полиелеи седален, глас 1:
Вечная ваша память, достоблаженнии Кирилле и Марие,/ яко в род и род благочестным житием вашим/ вернии людие спасение улучати поучаются.
Слава, и ныне, Богородичен:
Упование христианом, Пресвятая Дево,/ Бога, Его же родила еси, паче ума и слова,/ непрестанно моли с Вышними силами и с преподобными Кириллом и Марией/ дати оставление согрешений наших.
Таже степенна, 1-й антифон 4-го гласа. Прокимен, глас 4:
Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфея, зачало 43.
По 50-м псалме стихира, глас 6:
Приидите, вси вернии,/ родители Сергия Великаго восхвалим,/ сии бо в лице святых Земли нашея/ предстоят Престолу Пресвятыя Троицы/ и прилежно молятся/ о спасении душ наших.

Канон Пресвятей Богородице и преподобным, глас 8, егоже краегранесие: Прославляю родители Сергия Великаго.
Песнь 1
Ирмос: Колесницегонителя фараона погрузи,/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.
Припев: Преподобнии Кирилле и Марие, молите Бога о нас.
Преподобнаго Сергия, игумена Земли Русския,/ светлостьми добродетелей возсиявшаго,/ родители сподобистеся быти, Кирилле и Марие присноблаженнии.
Ревностно храняще заповедь апостола, страннолюбия не забывати,/ любовию к ближним распалаеми,/ воистину удостоистеся, блаженнии, Ангела Божия странноприяти.
Образу вашего благочестиваго супружескаго жития многия люди удивишася, преподобнии./ Сего бо ради Бог вас прослави и дарова плод благославный,/ его же Варфоломея, сына радости нарекосте.
Богородичен: Славим Тя, Богоневесто, рождшую Христа, Бога нашего, / Его же моли помиловати и спасти души наша.
Песнь 3
Ирмос: Утверждей в начале Небеса разумом/ и землю на водах основавый,/ на камени мя, Христе, заповедей Твоих утверди,/ яко несть свят, паче Тебе, Едине Человеколюбче.
Людие чудяхуся,/ егда услышаша трикратное возглашение младенца во чреве твоем, Марие приснопамятная./ Что убо отроча сие будет,/ - недоумевающе друг друга вопрошаху.
Аще родится младенец мужеска пола,/ приведем его в церковь, да послужит Благодетелю всех Богу,/ - сице рекли есте, боголюбивии супрузи,/ исполненнии веры славныя и любве благия.
Великия милости сподобистися от Бога добронравным житием вашим, блаженнии./ Темже и нам испросите богоприятными вашими молитвами/ оставление грехов, милости Божия и Царства Небеснаго.
Богородичен: Лютаго миродержца сетей избави нас, о Богомати,/ несть бо теплыя Заступницы, разве Тебе, Владычице.
Седален, глас 2:
Прииде, вернии, радостными песньми прославим преподобных Кирилла и Марию,/ и, с любовию лобызающе честныя мощи их, сице возопиим:/ радуйтеся, блаженнии, в боголюбии пожившии, милосердие к ближним имевшии,/ образ честнаго супружества и попечения о чадех явившии,/ смирение стяжавшии и в постничестве пребывшии./ Ныне же, предстояще Святей Троице, молитвами вашими, святии, отечество наше от сопротивных защитите,/ болезни исцелите и всяких искушений избавите / верою чтущих память вашу.
Слава, и ныне, Богородичен:
Не имамы иныя помощи и надежды,/ разве Тебе, Пречистая Мати Божия,/ Ты бо Бога плотию родила еси паче слова и разума./ Его же моли, Безневестная, с преподобными Кириллом и Мариею/ подати нам мир и велию милость.
Песнь 4
Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.
Яко же святый Предтеча взыграся радощами во чреве матери своея,/ тако и сын твой, Марие преподобная, взыграся во утробе, молящейся ти Господу в церкви./ Ты же, страхом и трепетом объята бывши взывала еси:/ силе Твоей слава, Человеколюбче.
Юдоли плачевней причастницы бывше,/ обаче подвиг супружества преславне совершивше и во иночестве поживше, преподобнии,/ ныне наслаждаетеся Небесныя трапезы./ Молитеся ко Господу, да умудрит православныя супруги во благочестии пребывати,/ иночествующим же ревностно обеты соблюдати.
Радости исполняются днесь российстии собори,/ имущи вас, блаженнии, теплыя молитвенники/ и усердныя заступники своему земному отечеству.
Богородичен: О, Всепетая Мати! О, мира Спасение!/ Не остави верою Тя призывающих,/ Ты бо еси Заступница усердная рода христианскаго.
Песнь 5
Ирмос: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго,/ но обрати мя и к свету заповедей Твоих/ пути моя направи, молюся.
Днесь память ваша, блаженнии, созывает люди на духовную трапезу./ Темже сподобите и нас достойно сия вкусити,/ да и пищи райския во обителех Отца Небеснаго вкупе с вами насладимся.
Имуще житие благочестием сияющее, достославнии, родителие,/ воистину древо благословенное явистеся,/ плод прекрасный израстивше.
Теплоту вашея любве к Богу, праведная чето,/ и ревность к иноческому житию восприят сын ваш, Сергий достохвальный,/ навыкая добродетелем и служа вам до блаженнаго преставления вашего.
Богородичен: Едину Чистую, едину Благословенную, вернии, ублажим,/ к Сыну бо Своему милостивно руце простирает,/ да обратимся к свету заповедей Его и пути наша исправим.
Песнь 6
Ирмос: Очисти мя, Спасе,/ многа бо беззакония моя,/ и из глубины зол возведи, молюся,/ к Тебе бо возопих, и услыши мя,/ Боже спасения моего.
Летняя ваша память веселит сословие иноков, преподобнии Марие и Кирилле./ Воистину блажени есте, яко имена ваша прославляются с сыном вашим, Сергием преподобным,/ его же величают игумена Земли Русския.
Истину в житии взыскующе, преподобнии,/ о телесных небрегосте и земная преобидесте,/ темже, мира отрекшеся, во обитель Хотьковскую вселистеся,/ идеже в подвизе иночества добре почисте.
Сохраните от зол вашими теплыми к Богу молитвами, преподобнии,/ всех, жительствующих во обители вашей,/ ей же вы начальницы и покровителие.
Богородичен: Его же родила еси, Сына Твоего и Бога,/ молити не престай, Богоневесто,/ да избавит обитель Твою от всякаго зла и спасет души наша.
Кондак, глас 4:
Днесь, вернии, сошедшеся,/ восхвалим двоицу блаженную благовернаго Кирилла и Марию добронравную,/ тии бо молятся вкупе со возлюбленным сыном своим, преподобным Сергием,/ ко Единому во Святей Троице Богу,/ отечество наше в правоверии утвердити,/ домы миром оградити,/ юныя от напастей и соблазнов избавити,/ старость укрепити / и спасти души наша.
Песнь 7
Ирмос: Божия снизхождения/ огнь устыдеся в Вавилоне иногда./ Сего ради отроцы в пещи, радованною ногою,/ яко во цветнице, ликующе, пояху:/ благословен еси, Боже отец наших.
Рака мощей ваших днесь чудеса источает/ верою притекающим к вам, блаженнии, иже и воспевают:/ благословен еси, Боже отец наших.
Град Москва и окрестныя грады и веси/ прославляют вас своя избавители от напрасныя смерти и целители от смертоносныя язвы./ Сего ради днесь, яко же прежде спасайте почитающих вас, преподобнии.
Измлада тяжкою болезнею одержима,/ девица некая внезапное исцеление прият вашими и сына вашего к Богу молитвами./ С нею же и мы благодарственно взываем:/ благословен еси, Боже отец наших.
Богородичен: Яко Деву и едину в женах, безсеменно рождшую Бога плотию/ прославляем Тя, о Богомати,/ и таковому Божию смотрению удивльшеся, взываем:/ благословен еси, Боже отец наших.
Песнь 8
Ирмос: Седмерицею пещь/ халдейский мучитель/ богочестивым неистовно разжже,/ силою же лучшею спасены сия видев,/ Творцу и Избавителю вопияше:/ отроцы, благословите, / священницы, воспойте,/ людие, превозносите во вся веки.
Воспоим, вернии, всечестную двоицу, Кирилла и Марию богоблаженных,/ от них бо возсия нам Сергий досточудный,/ украшение Церкве Православныя и монашествующих утверждение.
Единомудрени и единодушни добродетельми бысте, целомудреннии супрузи./ Помозите нам в чистоте и святости житие провождати,/ вас бо теплыя ходатаи к Богу стяжахом.
Любовь Христову, яже есть твердое основание супружеския жизни,/ со тщанием, блаженнии, хранили есте./ Сего ради молим вас:/ помозите супругом православным в любви сей пребывати/ и домом их благословение Божие стяжати.
Богородичен: Избави нас от бед и многих соблазнов, Всенепорочная,/ Тебе бо вси стяжахом прибежище и утверждение и спасение душ наших.
Песнь 9
Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.
Како ублажим вы, предобрая двоице!/ Како прославим благое сопряжение!/ Аще и земнии бысте, но Небесных достигосте, блаженнии,/ идеже Святей Троице предстоите и молите спастися любовию вас почитающим.
Ангельски на земли поживше,/ ангела земнаго и человека небеснаго, преподобнаго Сергия, миру явисте, святии,/ ныне же со Ангелы вкупе водворяетеся/ и с ними Трисвятую песнь Богови воспеваете.
Господь обитель Хотьковскую вами прослави, преподобнии иноцы,/ ею же Церковь Русская украшается и вам сице вопиет:/ радуйтеся, всехвальнии, отечеству нашему твердии заступницы.
Богородичен: О, великое заступление печальным, Богородице!/ О, милости пучина и миру Покров!/ Все упование на Тя возлагаем, сохрани нас под кровом Твоим.
Светилен:
Радуется днесь светло Церковь Русская,/ почитающи память вашу пречестную, Кирилле блаженне и Марие достохвальная./ Вами бо образ веры и благочестия показася/ и светильник отечеству нашему, Сергий преподобный, явися.
Слава, и ныне, Богородичен:
Яже Свет Божественный неизреченно рождшая,/ омраченных нас прилогами лукаваго и в лености живущих просвети, Всенепорочная,/ и настави к добродетелем, яко всех благих Подательница.
На хвалитех стихиры, глас 4:
Приспе днесь праздник преподобных Кирилла и Марии,/ радости духовныя исполненный,/ приидите, российстии собори,/ светло торжествуем,/ и сих хвалами и песньми почтим:/ радуйтеся, Небеснии человецы и земнии ангели,/ Земле Российския заступницы и хранителие,/ и молитвенницы о душах наших.
Заповедь страннолюбия соблюли есте, святии,/ людем бо в путьшествии сущим,/ дом свой прибежище являсте./ Ныне же в Небесных чертозех пребывающе,/ нам, в странствии жития сущим/ в крове Бога Небеснаго помозите водворитися/ вашими молитвами, блаженнии.
Добродетельми сияюще,/ благочестно в мире пожили есте,/ святе Кирилле и преславная Марие,/ смиренномудрием и чистотою украшенная./ Ныне же ходатаи к Богу будите о отечестве вашем/ и грехов оставление испросите/ чтущим любовию святую память вашу.
Блаженства непорочных вожделевше,/ путем заповедей Господних текосте/ и, суеты житейския избавитися хотяще,/ во обитель Пресвятыя Богородицы вселистеся,/ идеже земное странствие скончавше,/ Вышняго Сиона достигосте./ Молитеся о нас, преподобнии,/ причастие Небеснаго Царствия и спасения душ наших улучити.
Слава, глас 8:
Приидите, празднолюбцы, / песньми духовными благочестно восхвалим/ честную двоицу, благочестивую чету,/ Кирилла и Марию приснопамятных,/ иже во обитель Хотьковскую притекше,/ идеже и вечное упокоение обретоша./ Днесь же, раце мощей их молитвенно предстояще,/ яко покровителем и начальником обители сия,/ вкупе вси согласно взываем:/ радуйтеся, преподобнии Кирилле и Марие,/ обители Хотьковския преславное украшение.
И ныне, Богородичен:
Владычице, приими молитвы раб Твоих/ и избави нас/ от всякия нужды и печали.
Славословие великое. Ектении и отпуст.
На Литургии
Блаженны от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуия, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Матфея, зачало 10. Причастен: Радуйтеся, праведнии, о Господе, правым подобает похвала.