Служба свт. Игнатию

Месяца априллиа в 30-й день
Святителя Игнатия, епископа Кавказскаго

На малей вечерни
На Господи, воззвах: стихиры на 4, глас 2:

Подобен: Егда от Древа:
Святителю Игнатие пречудне,/ бысть Фиваида Российская земля
северная,/ иноческих подвигов и трудов твоих начало,/ идеже
Подвигоположника Господа Иисуса,/ в молитвеннем делании тебе укрепляюща,
обрел еси.
Егда, в возраст пришед,/ начальник монахов соделался еси,/ тогда обитель северная во имя Сергия преподобнаго прият тя, отче,/ и тамо познал еси меру скорбей великих и болезней тяжких,/ таже и утешения от присных братий твоих, и посещения явльшагося ти Духа Утешителя сподобился еси.
Страны южныя, близ Понта лежащия,/ послушанием Святей Церкви достигл еси, отче,/ во святительстем звании твоем/ явился еси отец и наставник народов и племен Кавказских,/ жаждавших слова Христова.
Егда же время отшествия твоего приближися,/ святителю Господень
Игнатие,/ тогда во обители иночестей на брезе Волжстем,/ труды слова и
молитвы полагая,/ со упованием к Богу отшел еси,/ в Немже обрет покой и
мир мног.
Слава, и ныне, Праздника.
На стиховне стихиры, глас 1:
Подобен: Небесных чинов:
Ученьми отца духовнаго наставляемь,/ отче Игнатие,/ правилом жизни иноческия обучался еси/ и, в послушаниих различных/ упражняяся усердно,/ путь святых совершил еси.
Стих: Честна пред Господем/ смерть преподобных его.
Мудрость стяжав духовную,/ такожде и знание писаний отеческих,/ чада послушания/ во множестве приобрел еси, отче,/ ихже к Царству Небесному и вечному/ духовно руководил еси.
Стих: Блажен муж, бояйся Господа,/ в заповедех Его восхощет зело.
Возлюбив душу ближняго твоего,/ еже ко Господу Спасу привести ю,/ любовь духовную к чадам твоим являя,/ псаломски восклицал еси:/ приидите, чада, послушайте мене,/ страху Господню научу вас.
Слава, и ныне, Праздника.
Тропарь писан на велицей вечерни.

На велицей вечерни
Блажен муж 1-й антифон. На Господи, воззвах: стихиры, глас 5.
Подобен: Радуйся:
Радуйся и веселися светло,/ земле Российская,/ новаго святителя Божия, Игнатия, явившая,/ иже веру Христову писаньми своими изъясни/ и, законы Духа восписуя,/ стезю жития духовнаго ясно содела.
Радуйся, святителю Игнатие предивне,/ измлада путь заповедей Христовых возлюбив,/ избранник Господень предивен явился еси,/ горнило же искушений и бед прешед,/ учитель православным людем показася,/ жизни вечныя законы духовные изъясняя.
Радуйся, иже во иночестем чине/ имя Богоносца восприял еси,/ сице и сам, святителю Игнатие,/ скорби и болезни, яко священномученик, терпя,/ чрез все житие твое/ Имя Христова внутрь сердца своего запечатлел еси,/ молитвою непрестанною укреплялся.
Радуйся, святителю Христов богомудре,/ Бога истиннаго и жива взыскав,/ даже до конца дний твоих предстоял еси Христу,/ молитвою непрестанною и любовию укрепляяся,/ таже терпением скорбей находящих утверждаяся.
Слава, глас 4:
К правде вечней и жизни некончаемей устремился еси,/ святителю Игнатие пречудне,/ и сия ближним твоим исповедуя,/ к любви Божией призывал еси,/ ныне же в незаходимей славе жития непрестающаго/ в Царствии Христове сияеши.
И ныне, Праздника.
Вход. Прокимен дне. И чтения три святительская.
На литии стихиры, глас 1:
Мысль спасительную,/ еже последовати учению святых отец,/ нарекл еси, отче преподобне, звезду твою,/ путеводствующую тя/ и освещающую тесный путь/ ума и сердца твоего к Богу.
Мысль благая,/ путеводствующая тя, отче богомудре,/ на источники, воды живыя/ приведе во обители иноческия,/ идеже в подвизех мнозех/ Бога приобрел еси.
Слава, глас тойже:
Страну истины обрел еси, отче преподобне,/ учение святых отец,/ и, тех писанием чрез все житие твое усердно последовав, взывал еси:/ сии суть звезды Небесныя, испущающия согласный и единый свет,/ сии суть корабли, идущии к пристани единей,/ сей лик, воспеваяй единую Божественную песнь,/ и, тех учению последуя,/ душу твою к вечней жизни управил еси.
И ныне, Праздника.
На стиховне стихиры, глас 6:
Песнь священную воспел еси, проподобне отче,/ под сению Креста Господня,/ песнь хвалы и благодарения,/ темже и людем Божиим, в странствии сущим,/ воздавати хвалу Богови у подножия Древа Крестнаго/ помози твоими молитвами.
Стих: Честна пред Господем/ смерть преподобных его.
Изъяснил еси нам, отче, писании твоими,/ что есть чаша Христова./ Сию чашу скорбей и напастей,/ отче преподобне,/ яко дар Божий, с благодарением приимати в житии нашем/ помози нам твоими молитвами.
Стих: Священницы Твои облекутся в правду,/ и преподобнии Твои
возрадуются.
Житейское море страстей и скорбей/ душею твердою прешел еси, яко кораблецем,/ темже души наша, волнами греховными обуреваемыя,/ сохрани в спасительнем корабли Церкве Христовы,/ яко молитвенник изрядный.
Слава, и ныне, Праздника.
Тропарь, глас 8:
Православия поборниче,/ покаяния и молитвы делателю и учителю изрядный,/ архиереев богодухновенное украшение,/ монашествующих славо и похвале:/ писании твоими вся ны уцеломудрил еси./ Цевнице духовная, Игнатие богомудре,/ моли Слова Христа Бога,/ Егоже носил еси в сердце твоем,/ даровати нам прежде конца покаяние.
Ин тропарь, глас тойже:
Избранник возлюблен Христови явился еси,/ Тому скорбьми многими и молитвою непрестанною прилепився,/ благодать Духа Святаго стяжав,/ учитель изряден людем был еси./ Поминай нас, святителю Игнатие, богоносе Российский,/ да учении и молитвами твоими покаяние спасительное обрящем/ и любовию сердечною Христу усвоимся.

На утрени
На Бог Господь: тропарь Праздника дважды. Слава, святителя. И ныне, Праздника.
По 1-м стихословии седален, глас 2:
Молитвами и скорбьми многими в житии твоем Христу соединився,/ учитель изряден и помощник людем твоим явился еси, святителю Игнатие,/ моли о чтущих память твою, блаженне.
Слава, и ныне, Праздника.
По 2-м стихословии седален, глас 8:
Рекл еси, отче: еже размышляти о вочеловечении Бога Слова,/ о спасительных страданиих и Воскресении Его,/ степень есть видения духовнаго,/ юже молитвами твоими сподоби ны стяжати, отче преподобне.
Слава, и ныне, Праздника.
По полелеи седален, глас 5:
Подобен: Преподобне отче:
Преподобне отче, святителю всечестне, ты учил еси,/ яко молитва, вера правая и терпение скорбей потребны, во еже спастися./ Помози нам, святче Божий,/ да ученьми твоими ограждаеми, спасение душ наших улучим.
Слава, и ныне, Праздника.
По 50-м псалме стихира, глас 6:
Познал еси тайну святыя трапезы Господни/ в сиянии светила великаго:/ якоже солнце, учил еси, во всяцей капли росы отображено есть,/ такожде и в трапезе Господни/ кийждо приобщен есть Христу всецело по Божеству и человечеству./ К сему же таинству со страхом Божиим и неосужденно приступати/ твоими молитвами, святе Игнатие, нас сподоби.

Канон Праздника и святителя, глас 8.
Песнь 1
Ирмос: Колесницегонителя фараоня погрузи/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца, спасе,/ песнь Богови воспевающа.
Путь духовный, к Богу Живу ведущий, прешел еси, святителю Игнатие,/ ясно указуя нам, како подобает стезю жития земнаго преходити,/ учению Христову внемлюще.
Первую ступень в лествице добродетелей Евангельских, нищету духовную, узрел еси, отче,/ и той последовати, тую возлюбити,/ тою пути духовнаго начало полагати завет твой дал еси.
Нищета духа, рекл еси, соль есть всех жертв духовных,/ нищета бо духа блаженство первое наречеся во Святем Евангелии Христове,/ ейже вси прочии блаженства, кротость, милосердие, сердца чистота, последуют и ею совершаются.
Богородичен: Мати Света, Пречистая Богородительнице,/ житие спасительно на земли с Сыном и Богом Твоим совершившая,/ нас, недостойных, укрепи, от грехов избави и к правде вечней шествовати утверди.
Песнь 3
Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.
Правду Христову в житии своем восписуя, святителю Христов Игнатие,/ обрел еси на пути сем, еже плакати и рыдати о содеянных злых/ и к Спасителю мира притекати.
В юности плачем иноческим горце восплакал еси в келлии своей/ о разрушении храма сердца человеческаго, Богом созданнаго Богослужения возвышеннаго ради, о пленении души и ума,/ от сих же всех токмо единем Богочеловеком Спасителем избавимся.
И паки плач стяжал еси, отче, в иночестем житии твоем,/ егда вся преграды, от Бога удаляющия тя, препобедил еси./ Сего плача ради помяни нас, чтущих святую память твою.
Богородичен: Дево Пречистая, печали наша и скорби утоляющая,/ плач спасительный подавай нам,/ да о бездне зол наших и неправд восплачем пред Тобою.
Седален, глас 3:
Поучал еси, отче достохвальне,/ яко молитву чисту стяжати, таже чувство покаяния и плача возлюбити/ довольно есть, во еже спасение вечное улучити,/ егоже и нас, грешных, сподоби молитвами твоими, святе.
Слава, и ныне, Праздника.
Песнь 4
Ирмос: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.
Тайны жития иноческаго взыскуя, блаженне Игнатие,/ познал еси, яко каятися подобает и труд иноческий ничтоже ино есть,/ еже делание непрестаннаго покаяния.
В покаянии, слезах и плаче о содеянных злых/ узрел еси, отче, спасения путь, к Горней жизни ведущий,/ иже предлежит и всякому носящему имя Христово.
Рекл еси, отче преподобне, яко должно есть покаянием страсти отсекати,/ таже покаянием доброделание стяжати,/ и аще не узрит око наше, яко грешни есмы,/ на имамы спасения вечнаго улучити.
Богородичен: Мати Божия, грешных Споручнице и Помощнице,/ путь наш, к Богу ведущий, покаянием истинным укрепи,/ зрением греха и исповеданием его направи.
Песнь 5
Ирмос: Вскую мя отринул ecи/ от лица Твоего, Свете Незаходимый,/ и покрыла мя есть чуждая тьма, окаянного,/ но обрати мя и к свету заповедей Твоих/ пути моя направи, молюся.
Плачем и покаянием непрестанным душу твою снабдевая, отче Игнатие,/ делатель молитвы явился еси, сию от возраста младенческаго возлюбив,/ и в основание жизни духовныя положил еси.
Молитвою усердною житие твое от юности укрепляя,/ даже до кончины подвиг твой молитвенный ко Христу Богу соблюдал еси,/ имже о Бозе Спасе утверждаяся.
В возраст мужеский пришед, монахов начальник быв и многообразныя скорби испытуя,/ в молитве твердей и непрестанней со многими слезами/, ослабу и отраду истинную почерпал еси, отче всеблаженне.
Богородичен: Дево Пречистая, Мати Христа Бога,/ венец молитвы неусыпающия,/ о нас, грешных, мольбу Богу принеси/ и молением Твоим от напастей и скорбей нас избави.
Песнь 6
Ирмос: Молитву пролию ко Господу/ и Тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя.
Явился еси учитель молитвы сердечныя, отче наш Игнатие,/ ясно наставляя, како должны есмы пред Лицем Христовым предстояти/ и молитву покаяния творити.
Подобает на молитве, поучал еси, отче,/ встати в лице прокаженных, слепых, глухих, хромых/ и тако ко Христу, от сердца сокрушеннаго,/ от нищеты духа нашего, молитву тщатися творити.
Егда тишина возвеет в сердце на молитве, поучал еси, отче,/ и мир ко всем, смирение, сострадание и любовь к человеком,/ тогда познаем, яко благодать Духа Свята сие содела.
Богородичен: Мати Божия, Духа Святаго приятелище непостижимое,/ о смертных нас молися/ и молитву нашу к Богу управи.
Кондак, глас 8.
Подобен: Аще и во Гроб:
Аще и совершал еси стезю жития земнаго, святителю Игнатие,/ обаче непрестанно зрел еси законы бытия вечнаго,/ сему поучая ученики словесы многими,/ имже последовати и нам, святче, помолися.
Икос:
Рекл еси, отче, в писаниих твоих,/ яко подобает имети страх Божий,/ дабы вступити в совершенство всех добродетелей, любовь Божию,/ и тако Отцу Небесному уподобитися./ Сему учению последовати и нам, святче, помолися.

Синаксарий.
(Из поучений святителя Игнатия «О внимании при молитве»):
Молитва нуждается в неотлучном соприсутствии и содействии внимания. Молитва составляет неотъемлемую собственность молящегося, а при отсутствии внимания она чужда молящемуся. При внимании она приносит обильный плод; без внимания она приносит терние и волчцы. Плод молитвы состоит в просвещении ума и умилении сердца, в оживлении души жизнию Духа; терние и волчцы — это мертвость души, фарисейское самомнение.
Внимание, которое вполне охраняет молитву от отвлечения или от посторонних помыслов и мечтаний, есть дар благодати Божией. Искреннее желание получит благодатный дар, душеспасительный дар внимания принуждением себя ко вниманию при каждой молитве нашей. Искусственное внимание, еще неосененное благодатию, состоит в том, чтоб заключить ум в слова молитвы. Если ум, по причине новости своей в молитвенном подвиге, выйдет из заключения в слова, то должно опять вводить его в них. Свойственны уму, в состоянии его падения, настоятельность и расположение парить повсюду. Но Бог может даровать ему непоколебимость, и дарует ее в свое время за постоянство и терпение в подвиге.
Особенно способствует вниманию во время молитвы весьма неспешное произнесение слов молитвы. Произноси слова не спеша, чтобы ум мог с большим удобством сохранить заключение свое в словах молитвы, чтобы он не ускользал ни из одного слова ее. Когда ты молишься наедине, произноси слова несколько вслух — это способствует сохранению внимания.
Запасись благовременно всесильным оружием — молитвою, благовременно научись действовать им. Молитва всемогуща по причине действующего в ней Всемогущего Бога. Она — «меч духовный, иже есть глагол Божий». Молитва, по качеству своему, есть пребывание человека при Боге и соединение человека с Богом; по действию своему она — примирение человека с Богом, мать и дщерь слез; мост, по которому переходят чрез искушения; стена, защищающая от скорбей; сокрушение браней, бесконечное делание, источник добродетелей, причина духовных дарований, невидимое преуспеяние, пища души, просвещение ума, отсечение отчаяния, указание надежды, резрешение печали.
Сначала нужно понуждаться к молитве; вскоре она начнет доставлять утешение и этим утешением облегчать понуждение, ободрять к понуждению себя. Но к молитве нужно понуждение в течение всей жизни, молитва действует убийственно на нашего ветхого человека; доколе он жив в нас, дотоле противится молитве, как и вкушению смерти1.
По важному значению молитвы, пред упражнением ею нужно приготовление себя к ней2.
Песнь 7
Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:/ благословен ecи, Господи Боже, во веки.
В зимнем обнажении ветвей древесных поучался еси, отче, тайне воскресения мертвых,/ якоже бо древо во время свое листвием покрывается, тако и кости человеческия оживут/ и, облекшеся плотию, в мир новый вступити имут.
Познал еси, отче, елико возможно,/ тайну кончины бытия человеческаго, тайну естества ангельскаго и души человеческия,/ и воздал еси благодарение Богу.
Единаго токмо Бога, Духа Истины, исповедал еси,/ Иже Един всесовершен есть,/ Емуже поклоняющеся, тя, отче, величаем.
Богородичен: Дево Марие, Мати Неизреченнаго Света,/ нас, грешных, от мысленных падений огради,/ Божественное же учение Церкве Святыя в сердцах наших укрепи.
Песнь 8
Ирмос: На горе святей прославльшася/ и в купине огнем Приснодевы Моисеови тайну явльшаго, / Господа пойте/ и превозносите во вся веки.
Возлюбил еси, отче, служите братии словом Божиим,/ и бысть тебе служение сие в подвиг жития твоего,/ нам же в радование непреложное, вопиющим ти:/ не остави нас, отче, словом и молитвами твоими.
В служении Слову услышал еси в души твоей глас уверения во спасении,/ сего ради преискренне возлюбил еси ближних твоих/ и самое то Слово Божие.
Поучал еси ближних твоих, святителю,/ яко Спаситель наш есть Огнь Небесный,/ Иже и в словесех Его Евангельских действует.
Богородичен: Мати Божия, Бога Слова рождшая, даждь слово рабом Твоим,/ еже сказати тайну всемилостиваго заступления Твоего,/ в тайне рождения Слова, Христа Бога, явльшуюся.
Песнь 9
Ирмос: Ужасеся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают.
Многи труды и болезни подъяв в житии твоем, святителю всечестне,/ Кресту Христову, светло сияющу, поклонился еси/ и молитву твою ко Христу простерл еси.
Скорбьми обуреваемый, зрел еси в видении в келлии своей Странника, посетившаго тя./ Откуду шествуеши? И где селение Твое? Почто доселе оставлял еси е? —/ сладце вопиял еси, отче, явльшемуся ти Христу.
В хождении пред Господем познал еси, отче, судьбы отечества твоего,/ таже и кончину твою ясно провидел еси,/ к Богу Слову, Христу возлюбленному, молитвенно устремлялся.
Богородичен: Мати Божия, Сияние неизреченнаго Света,/ стопы наша к жизни вечней направи,/ прощающи вся злая, нами содеянная.
Светилен Праздника.
Слава, святителя:
Имя Богоносца преславнаго в монашестем образе твоем восприем,/ отче Игнатие, святителю всечестне,/ Христа молитвою непрестанною внутрь сердца твоего вселил еси/ и был еси учитель, к Свету невечернему ведый,/ богоносец воистинну досточудный явився.
И ныне, Праздника.
На хвалитех стихиры, глас 8:
В житии твоем поучал еси, отче преподобне,/ яко сердце человеческое обретает покой,/ егда в заповедех Христовых пребывает,/ изобразите бо в души образ Христов/ благо есть и спасительно,/ сего же и нас достигнути/ милостивно сподоби молитвами твоими.
Христу последовал еси усердно, святителю Игнатие,/ вся мирская отложив и Крест Господень на рамо взем,/ темже пути совершенства достигл еси,/ к сему и нас приведи, отче,/ молитвами твоими.
Приидите, собори людей Божиих,/ припадем усердно ко источнику приснотекущему,/ святителю Игнатию, богоносцу Российскому,/ и восхвалим, усердно просяще:/ молитвами твоими, святителю,/ подай просвещение душам нашим.
Слава, и ныне, Праздника.
Словословие великое. Ектении. И отпуст.
На Литургии служба Праздника и святителя.